ललितपुर । संख्यात्मकरूपमा निजी विद्यालयहरुको बाहुल्यता रहेको ललितपुरमा सामुदायिक विद्यालयहरूको प्रतिष्ठा बढाउँदै, त्रि-पद्म विद्याश्रम माध्यमिक विद्यालयले उल्लेखनीय सफलता प्राप्त गर्दै पुरस्कृत भएको छ । ललितपुर महानगरपालिकाको १०६औं स्थापना दिवसका अबसमा आयोजित कार्यक्रममा सामुदायिक विद्यालयहरूमध्ये अग्रणी स्थान हासिल गर्दै, शैक्षिक क्षमताको उत्कृष्टता प्रदर्शन गरेर यस वर्ष उत्कृष्ट नतिजा ल्याएबापत महानगरपालिकाद्वारा पुरस्कृत भएको हो ।
केही दिनअघि भएको विशेष कार्यक्रममा सम्माननीय प्रधानमन्त्री के पी शर्मा ओली र नगर प्रमुख चिरिबाबु महर्जनले विद्यालयका प्रधानाध्यापक हरिप्रसाद खनाललाई नगद पुरस्कार प्रदान गर्नुभएको थियो । विद्यालयले नगद पुरस्कार स्वरूप रु ७ लाख ५० हजार रुपैया प्राप्त गरेको छ
। त्यस्तै विद्यालयकी छात्रा प्रिन्सी कर्णलाइ व्यक्तिगत रूपमा रु २ लाख सहित सम्मान गरिएको छ । उनले यसपालिको एसईई परीक्षामा ३.९६ जीपीए हासिल गरी उत्कृष्ट नतिजा ल्याएर विद्यालयलाई गौरवान्वित बनाएकी थिइन् ।
विद्यालयका प्रधानाध्यापक हरिप्रसाद खनालले यो सफलता सम्पूर्ण शिक्षकहरूको अथक मेहनत, विद्यार्थीहरूको लगनशीलता, र अभिभावकहरूको निरन्तर समर्थनको परिणाम भएको बताउनुभयो । उहाँले विद्यालय व्यवस्थापन समितिको कुशल नेतृत्व र शिक्षकमण्डलीको समर्पणको प्रशंसा गर्दै भविष्यमा अझ उत्कृष्ट नतिजा हासिल गर्न प्रतिबद्ध रहेको घोषणा गर्नुभयो । यसपालि उत्कृष्ट नतिजा ल्याएर पुरस्कार पाएपछि शिक्षक, अभिभावक र विद्यार्थीमा अझ बढी सक्रियता बढेको प्रअ खनालको भनाइ छ ।
अतिरिक्त क्रियाकलाप इन्चार्ज पवन कोइरालाका अनुसार नियमित पठनपाठनसँगै अतिरिक्त क्रियाकलापमा जोड दिँदा यस विद्यालयका विद्यार्थीले राम्रो नतिजा हासिल गरिरहेका छन् । विद्यालयको यो सफलता शिक्षक, विद्यार्थी र व्यवस्थापन पक्षको सहकार्यको प्रतिफल हो । उनले भने यस उपलब्धिले विद्यालयको शैक्षिक प्रतिष्ठा केवल ललितपुरमा मात्रै नभएर राष्ट्रियस्तरमै स्थापित गरेको छ ।
त्रि-पद्म विद्याश्रम माध्यमिक विद्यालयले सामुदायिक विद्यालयहरूको लागि प्रेरणाको स्रोतका रूपमा नयाँ उचाइ कायम गरेको छ । विद्यालयले भविष्यमा पनि शैक्षिक उत्कृष्टताका नयाँ आयाम स्थापित गर्दै सामुदायिक शिक्षा क्षेत्रको गौरवलाई थप उचाइमा पुर्याउने लक्ष्य लिएको छ।
यस ऐतिहासिक उपलब्धिका लागि विद्यालयका सम्पूर्ण सदस्यहरूलाई हार्दिक बधाई तथा शुभकामना।